सोलापूर: (उंबरे-पागे): कान्हापुरी रोडवरील उजनी डाव्या मुख्य कालव्यात (मेन कॅनॉल) पडून बेपत्ता झालेल्या एका ऊस तोडणी मजुराचा मृतदेह दोन दिवसांच्या अथक प्रयत्नांनंतर शोधून काढण्यात 'चंद्रभागा रेस्क्यू सेवा टीम, महाराष्ट्र राज्य'ला यश आले आहे. या कामगिरीमुळे टीमच्या तत्परतेचे व सामाजिक कार्याचे सर्वत्र कौतुक होत आहे.
नेमकी घटना काय?
उंबरे (पागे) येथील मोहन कानगुडे यांच्या ऊस तोडणी टोळीतील एक मजूर २० फेब्रुवारी २०२६ रोजी कान्हापुरी रोडवरील कानगुडे पुलावरून उजनीच्या मुख्य कालव्यात पडला होता. या दुर्दैवी घटनेची माहिती मिळताच चंद्रभागा रेस्क्यू सेवा टीमने तातडीने घटनास्थळी धाव घेतली.
दोन दिवसांचे अथक शोधकार्य कालव्यातील पाण्याचा वेग आणि खोली अधिक असल्याने शोधमोहिमेत मोठे अडथळे येत होते. प्रतिकूल परिस्थितीवर मात करत रेस्क्यू टीमने सलग दोन दिवस शोधमोहीम सुरू ठेवली. अखेर, २२ फेब्रुवारी २०२६ रोजी उंबरे (पागे) येथील कोरके पुलाजवळ संबंधित मजुराचा मृतदेह आढळून आला. रेस्क्यू टीमने अत्यंत संयमाने व धैर्याने मृतदेह बाहेर काढला.
रेस्क्यू टीमचे विशेष योगदान या संपूर्ण मोहिमेचे नेतृत्व संस्थेचे अध्यक्ष अनिल भुई (कान्हापुरी) यांनी केले. त्यांच्या मार्गदर्शनाखाली टीममधील भगवान भुई, नवनाथ गेजगे, शामराव गेजगे, सागर गेजगे, सुरज भुई आणि विजय सल्ले यांनी मोलाची कामगिरी बजावली.
संकटाच्या काळात मदतीला धावून जाण्याच्या आपल्या शिरस्त्याप्रमाणे, चंद्रभागा रेस्क्यू टीमने पुन्हा एकदा सामाजिक बांधिलकीचे दर्शन घडविले असून, त्यांच्या या कार्याचे परिसरातून कौतुक होत आहे.
